Det de vastelaovendj hét fieëst van ’t jaor és, dao zeen vae ’t neteurlik allemaol over eins! Mer toch woor d’r, ‘n jaor of 9 geleje, ’n gruupke manne deej ’t tiêd vonge um ’n now evenement tow te veuge aan de Wieërter vastelaovendj.
Nao verschillendje vergaderingen, beej-einkomste en oûch wat potte beer wore ze d’r aan uut. ’n Kroegetocht doeër de binnestad van Wieërt zoeëdet neet allein de vastelaovendj trök oppe straot kwoom, mer ouch de kroege profiêt zooje hebbe van dit evenement.
De Wieërter 11 waas ’n feit!
’t Ieërste jaor haaje vae drek priês met code roeëd in Nederland en ‘ne storm dae oeëver Wieërt trok, mer ondanks det haaje vae toch ’n schoeën 250 daelnemers beej mekaar gekrege!
Um uut einlaopendje redene hebbe vae helaas aafscheid motte neme van înkele daelnemendje kroege, mer vae mochten dao naeve ouch weer echte Wieërter kroege verwelkaome!
De basis van ’t evenement és de aafgeloupe jaore wieter neet vol verangerdj, ’n mobiel podium met völ knouwel en spektakel det veurop gieët, met dao achter ‘ne enthousiaste groep deîlnemers. Waal prebieëre vae eder jaor now illemênte tow te veuge aan de edities, um zoeë de deîlnemers te bliêve verrasse.
Vae zeen dan ouch mer wat gruuëts det vae dit jaor alwieër de 8e editie moge organisieëre van de Wieërter 11!
